KNNC
كۆمپانیای نه‌وتی باكور رایده‌گه‌یه‌نێت، رۆژانه زیاتر له 400 هه‌زار به‌رمیل نه‌وت له‌پارێزگای كه‌ركوكه‌وه ره‌وانه‌ی به‌نده‌ری جیهانی توركی ده‌كه‌ن و له داهاتوشدا ئه‌و بڕه به‌رزده‌كه‌نه‌وه.
سه‌رچاوه‌یه‌ك له كۆمپانیای نه‌وتی باكور رایگه‌یاند، دوای ئه‌وه‌ی له‌ماوه‌ی رابردودا هه‌نارده‌كردنی نه‌وت بۆ به‌نده‌ری جیهانی توركی له‌رێگه‌ی بۆرییه‌وه به‌ڕێژه‌یه‌كی به‌رچاو كه‌مبۆوه، له‌ئێستادا هه‌نارده‌كردنی نه‌وت به‌شێوه‌یه‌كی ئاسایی ده‌ستیپێكردۆته‌وه‌و رۆژانه بڕی 400 تاكو 425 هه‌زار به‌رمیل هه‌نارده ده‌كه‌ن.
ئه‌و سه‌رچاوه‌یه ئاماژه‌ی به‌وه‌شداوه، كۆمپانیاكه‌یان به‌نیازه له‌ماوه‌ی داهاتوودا ئاستی هه‌نارده‌كردن به‌رزبكاته‌وه.
ئه‌وه‌ش له‌دوای ئه‌وه‌دێت كه پێشتر ئاستی هه‌نارده‌كردنی نه‌وت له‌پارێزگای كه‌ركوكه‌وه بۆ به‌نده‌ری جیهانی توركی دابه‌زینی به‌رچاوی به‌خۆوه بینی، به‌هۆی راگرتنی هه‌نارده‌كردنی نه‌وت له‌لایه‌ن حكومه‌تی هه‌رێم و ئه‌و هێرشانه‌ی ناوبه‌ناو بۆسه‌ر هێڵی بۆریه‌كه ئه‌نجام ده‌درێت.