KNNC

لیستی‌ عێراقییه‌ هێرشی توند ده‌كاته‌ سه‌ر نوری مالكی سه‌رۆك وه‌زیران و ئاشكرای ده‌كات، ئه‌گه‌ر مالكی مه‌له‌فه‌كان ئاشكرانه‌كات ئه‌وا ئه‌ویش شه‌ریكی تاوانه‌كانه‌ .

مه‌یسون ده‌مه‌لۆجی وته‌بێژی لیستی عێراقیه‌ راگه‌یاندنه‌كه‌ی نوری مالكی له‌ئه‌گه‌ری ئاماده‌بونی له‌ په‌رله‌مانی عێراق و ئاشكراكردنی مه‌له‌فه‌كان به‌ سه‌یر وه‌سفده‌كات و رایده‌گه‌یه‌نێت ئاشكرانه‌كردنی ئه‌و مه‌له‌فانه‌ ئه‌وه‌ ده‌گه‌یه‌نێت مالكیش شه‌ریكی‌ مه‌له‌فه‌كانه‌.

له‌به‌یاننامه‌یه‌كدا وته‌بێژی‌ عێراقیه‌ ده‌ڵێت: وه‌ڵامه‌كه‌ی مالكی بۆ ئاماده‌بونی له‌په‌رله‌مان له‌یه‌ككاتدا مایه‌ی سه‌رسوڕمان و توره‌بونیشه‌، له‌كاتێكدا مالكی رایده‌گه‌یه‌نێت كه‌ چه‌ندین مه‌له‌فی په‌رله‌مانتاران و به‌رپرسانی حكومی  لایه‌ كه‌ ده‌ستیان له‌ته‌قینه‌وه‌كاندا هه‌یه‌ و بونه‌ته‌ هۆكاری تێكچونی دۆخی ئه‌منی و به‌هۆیه‌شه‌وه‌ 4 كاندیدی عێراقیه‌و 10 چالاكوانی عێراقییه‌ كوژراون، ئاشكرانه‌كردنی ئه‌و كه‌سانه‌و مه‌له‌فه‌كانیان وه‌هاده‌كات مالكیش شه‌ریكی تاوانه‌كان بێت.

له‌چه‌ند رۆژی رابوردودا نوری مالكی سه‌رۆك وه‌زیران ئه‌وه‌ی ئاشكراكردبوو ئه‌گه‌ر بێت و ئاماده‌ی دانیشتنه‌كانی په‌رله‌مان بێت ئه‌وانه‌ دونیا سه‌ره‌وژێر ده‌كات و چه‌ندین مه‌له‌فی په‌رله‌مانتاران و به‌رپرسانی حكومی ئاشكراده‌كات كه‌ ده‌ستیان له‌ ته‌قینه‌وه‌كاندا هه‌یه‌.