KNNC
دوای كه‌مكردنه‌وه‌ی هاوكارییه داراییه‌كانی ئه‌مریكا له 260 ملیۆن دۆلاره‌وه بۆ 22 ملیۆن دۆلار له‌بودجه‌ی 2014ی وڵاته‌كه‌یدا، باڵیۆزخانه‌ی ئه‌مریكا رایده‌گه‌یه‌نێت پرۆژه یاسای بودجه له‌گۆنگرێسی ئه‌مریكادایه‌و بواری گۆڕانكاری تێداهه‌یه.
رۆژنامه‌ی عالمی عێراق له‌زاری سه‌رچاوه‌یه‌كی باڵیۆزخانه‌ی ئه‌مریكاوه له‌به‌غداد بڵاویكرده‌وه، پرۆژه یاسای بودجه‌ی 2014ی ئه‌مریكا له‌كۆنگرێسدایه‌و گفتوگۆ ده‌كرێت، بۆیه بواری گۆڕانكاری و هه‌مواركردنه‌وه‌ی هه‌یه، ئه‌وه‌ش دوای ئه‌وه‌ی له‌پرۆژه‌كه‌دا هاوكارییه داراییه‌كانی ئه‌مریكا له 262 ملیۆن دۆلاره‌وه كه ئه‌مساڵ بۆ عێراق دابینیكردوه، كه‌مكراوه‌ته‌وه بۆ 22 ملیۆن دۆلار.
له‌وباره‌یه‌وه ئه‌ندامێكی هاوپه‌یمانی نیشتمانی رایگه‌یاندوه ئه‌و كه‌مكردنه‌وه‌یه نیشانه‌ی گه‌شه‌ی ئابوری عێراق و كه‌مبونه‌وه‌ی پێویستیه‌كانی به‌ئه‌مریكا.
هاوكات مه‌حما خه‌لیل ئه‌ندامی هاوپه‌یمانی كوردستان ده‌ڵێت ئه‌وه نیشانه‌ی ناڕازیبونی ئه‌مریكایه له‌سیاسه‌ته‌كانی حكومه‌تی ئێستای عێراق و لاوازبونی پێگه‌ی عێراقه له‌ستراتیژی ویلایه‌ته یه‌كگرتوه‌كانی ئه‌مریكادا.