KNNC
ژماره‌ی كوژراوانی ته‌قینه‌وه‌كه‌ی شاری پیشاوه‌ری پاكستان بۆ 18 كوژراو 58 بریندار به‌رزبووه‌وه.
پۆلیسی پاكستان ئاشكرای كرد شه‌وی رابردوو له شاری پیشاوه‌ر بۆمبێك له ناو ئاپۆرای لایه‌نگرانی پارتی نیشتمانی عه‌وام كه به مه‌به‌ستی بانگه‌شه‌ی هه‌ڵبژاردن كۆببوونه‌وه ته‌قیوه‌ته‌وه و به هۆیه‌وه لانیكه‌م 18 كه‌س كوژراون و 58 كه‌سی دیكه‌ش بریندار بوون.
هاوكات بزوتنه‌وه‌ی تاڵیبان له به‌یاننامه‌یه‌كدا به‌رپرسیارێتی ته‌قینه‌وه‌كه‌ی گرته ئه‌ستۆ.
له لایه‌كی دیكه‌وه فڕۆكه بێفڕۆكه‌وانه‌كانی ئه‌مریكا به‌یانی ئه‌مڕۆ چه‌ند موشه‌كێكیان ئاراسته‌ی ناوچه‌یه‌كی خێڵنشینی وه‌زیرستانی باكوری كردوه و به هۆیه‌وه 5 كه‌س كوژراون كه پێده‌چێت چه‌كداری تاڵیبان بن.
هاوكات دادگای باڵای پاكستان رێگه‌ی به خۆكاندیدكردنی په‌روێز موشه‌ڕه‌فی سه‌رۆكی پێشووی پاكستان بۆ هه‌ڵبژاردنی په‌رله‌مانی ئه‌و وڵاته نه‌داو پێشبینی ده‌كرێت ئه‌و هه‌نگاوه‌ش ناڕه‌زایی لایه‌نگرانی موشه‌ڕه‌فی لێبكه‌وێته‌وه.