KNNC
له میانه‌ی رێوشێنێكی توندی ئاسایشیدا حوسنی موباره‌كی سه‌رۆكی پێشووی میسر، له نه‌خۆشخانه‌وه گوازرایه‌وه بۆ زیندانی تۆڕه.
دوای ئه‌وه‌ی داواكاری گشتی میسر بڕیاریدا جارێكی تر موباره‌ك ره‌وانه‌ی زیندان بكرێته‌وه، به‌یانی ئه‌مڕۆ پێنجشه‌ممه 18ی نیسانی 2013، له میانه‌ی رێوشوێنێكی توندی ئه‌منیدا له نه‌خۆشخانه‌ی سه‌ربازیی مه‌عادیه‌وه له رێگای ئۆتۆمبیلێكی فریاكه‌وتنه‌وه گوازرایه‌وه بۆ نه‌خۆشخانه‌ی زیندانی تۆڕه.
هاوكات له‌گه‌ڵ گه‌یشتنی موباره‌ك بۆ زیندانی تۆڕه، هێزه ئه‌منیه‌كان رێگای سه‌ره‌كی ناوچه‌كه‌یان به مه‌به‌ستی پاراستنی ئاسایشی موباره‌ك داخست.
هه‌روه‌ك سه‌دان كه‌س له لایه‌نگرانی موباره‌ك وه‌ك ناڕه‌زایی ده‌ربڕینێك به‌رامبه‌ر به گواستنه‌وه‌ی بۆ زیندانی تۆڕه خۆپیشاندانیان ئه‌نجامدا.
رۆژی رابردوو دادگای تێهه‌ڵچونه‌وه‌ی میسر 11 ی مانگی داهاتووی بۆ دوباره دادگاییكردنه‌وه‌ی محه‌مه‌د حسنی موباره‌ك ده‌ستنیشانكرد، ئه‌وه‌ش له‌دوای ئه‌وه‌ی كه شه‌ممه‌ی رابردوو دادگاییكردنه‌كه‌ی له‌دۆسیه‌ی كوشتنی خۆپیشانده‌راندا دواخرا، به‌هۆی ده‌ستله‌كاركێشانه‌وه‌ی دادوه‌ری دانیشتنه‌كه.