به‌شێوه‌یه‌كی فه‌رمی چه‌ند یانه‌یه‌كی گه‌وره‌ی ئه‌وروپا بۆند به‌مه‌به‌ستی گواستنه‌وه‌ی ماریۆ گۆمێز پێشكه‌شی یانه‌ی بایرن میونخ ده‌كه‌ن‌و ئه‌و هێرشبه‌ره‌ش به‌ته‌واوه‌تی رۆیشتنی له‌ئالیانز ئه‌رینا یه‌كلاییكردۆته‌وه‌.
له‌لێدوانێكیدا بۆ رۆژنامه‌ی بێڵدی ئه‌ڵمانی ئۆلی فیربه‌ر به‌ریِوه‌به‌ری كاره‌كانی ماریۆ گۆمێز ئاشكرایكردوه‌ یانه‌كانی ئینته‌رمیلان‌و ئه‌ی سی میلان‌و یۆڤانتۆس به‌فه‌رمی بۆ گواستنه‌وه‌ی ئه‌و هێرشبه‌ره‌ هاتونه‌ته‌ پێشه‌وه‌و بۆ ئه‌و مه‌به‌سته‌ش بۆندی خۆیان پێشكه‌شكردوه‌.
له‌درێژه‌ی لێدوانه‌كه‌شیدا رایگه‌یاند گۆمێز به‌ته‌واوه‌تی له‌بایرن میونخ بێزار بوه‌و ده‌یه‌وێت له‌كاتی گواستنه‌وه‌ی هاوینه‌ی یاریزانان ئه‌و یانه‌یه‌ به‌جێبهێڵێت‌و ناتوانێت له‌گه‌ڵیاندا به‌رده‌وامبێت.
گۆمێز له‌م وه‌رزه‌دا بووه‌ هاوڕێی كورسی یه‌ده‌گ‌و ئه‌ویش په‌یوه‌ندییه‌كانی له‌گه‌ڵ ئه‌و یانه‌یه‌دا تێكداو له‌ئێستاشدا له‌بۆندی ئه‌و یانه‌ ئیتاڵیانه‌ ده‌كۆڵێته‌وه‌.